Премьер-Министр Олжас Бектеновтің төрағалығымен Үкіметте Денсаулық сақтау министрлігінің Әлеуметтік медициналық сақтандыру қорының қызметін жетілдіру, сондай-ақ Мемлекет Басшысы қойған медициналық қызметтердің сапасын арттыру жөніндегі міндеттер шеңберінде денсаулық сақтау саласын цифрлық трансформациялау жөніндегі тәсілдері қаралды. Қазақстанда міндетті әлеуметтік медициналық сақтандыру жүйесімен шамамен 17 млн адам қамтылған, оның 12 млн-ға жуығы жеңілдік санаттарға кіреді. Денсаулық сақтау министрі Ақмарал Әлназарова МӘМС қаражатының жиынтық көлемі 6 жыл ішінде 6,8 трлн теңгеден асқаны, оның 2 трлн теңгесі азаматтардың жеңілдік санаттары үшін мемлекеттің жарналарын құрайтынын мәлімдеді. Тек ағымдағы жылы 1,4 трлн теңге көлемінде жарналар түсті.

Міндетті әлеуметтік медициналық сақтандыру пакетін кеңейтуді ескере отырып, 2026 жылғы 1 қаңтардан бастап кеңеске қатысушылар цифрлық тетіктерді енгізу арқылы ашықтық және бақылауды күшейту мәселелерін талқылады. Бүгінгі таңда Қазақстанда медициналық көмек түрлерінің 92%-ы автоматты түрде бөлінеді. 2026 жылдың соңына дейін бұл көрсеткішті 100%-ға дейін жеткізу жоспарланып отыр, бұл адами факторды толығымен алып тастауға мүмкіндік береді.

Денсаулық сақтау, Еңбек және әлеуметтік қорғау министрліктерінің жүйелерімен Қордың АЖ интеграциясы, eGov жеңілдікті санаттар бойынша деректерді автоматты түрде жаңартуды қамтамасыз етті және медициналық сақтандыру жүйесінің жарналарын есепке алудың дәлдігін арттырды.

Ағымдағы жылы халықтың медициналық қызметтер көлеміне нақты қажеттілігін есептеуді ескере отырып, жоспарлау қағидаларын, әдістемелері мен тәсілдерін бекіту маңызды қадам болды. Келесі жылы жоспарлаудың барлық процесін цифрландыру аяқталады, бұл есептеулерді тек тарихи деректер негізінде ғана емес, сонымен қатар көрсетілген медициналық көмектің нақты көлемін және болжамдарды ескере отырып жүзеге асыруға мүмкіндік береді.

2025 жылғы 1 шілдеден бастап сапа мониторингі және медициналық қызметтерге ақы төлеу Бірыңғай цифрлық контурда біріктірілген. Жаңа модуль төлем құжаттарының санын 9-дан 3-ке дейін қысқартуды және 1С бухгалтериямен үздіксіз интеграцияны қамтамасыз етті. Сонымен қатар, жүйенің «әлсіз жақтары» да анықталды. Ықтимал қауіптер Денсаулық сақтау министрлігінің бақылауында және цифрлық құралдарды енгізу арқылы жойылады.

Медициналық ұйымдарда Face ID жүйесі енгізілуде, бұл медициналық мекемелер тарапынан тіркеулер санын 7%-ға төмендетуге және бюджет қаражатының шамамен 10,5 млрд теңгесін үнемдеуге мүмкіндік берді.

Келесі жылы медициналық қызметтерді бөлу үшін рейтингтік бағалауды есептеу индикаторларын толық цифрландыру жоспарлануда. Нәтижесінде медициналық көмектің жоғары сапасы мен қолжетімділігін қамтамасыз ететін өнім берушілер қаржыландыруға қол жеткізе алады. Келесі жылы медициналық деректердің бірыңғай қоймасын қалыптастыру жөніндегі жұмыстың аяқталуы көрсетілетін медициналық көмекті жоспарлау мен сапасын жақсарту түрінде әсер етеді.

Жүйені одан әрі дамыту шеңберінде мониторинг процестеріне ЖИ құралдарын енгізу, толыққанды биллингтік жүйе ретінде «төлем» модулін дамыту, клиникалық хаттамалар мен медициналық көмек көрсету стандарттарын цифрландыру, сондай-ақ медициналық деректердің бірыңғай қоймасымен интеграциялау көзделген. Бұл шешімдер күнделікті операцияларды автоматтандыруға, адами факторды азайтуға және барлық медициналық төлем процестерін басқарудың ашықтығын арттыруға бағытталған.

Халықты дәрі-дәрмектермен қамтамасыз ету мәселелеріне бөлек назар аударылды. Клиникалық хаттамаларды цифрландыру және бірлесіп төлеу тетіктерін енгізу бойынша кезең-кезеңмен жұмыстар жүргізілуде, бұл ем алушыларды қажетті препараттармен қамтамасыз ету үдерістерін оңтайландыруға мүмкіндік береді.

«Біздің бағыт – көрсетілетін медициналық қызметтердің сапасын үнемі жақсарта отырып, қолжетімділігін арттыру. Цифрландырудың алғашқы нәтижелерін қазірдің өзінде көріп отырмыз. Озық технологияларды қарқынды енгізуді жалғастыру қажет. Процестерді автоматтандыру медициналық персоналды бюрократиялық рәсімдерден босатып қана қоймай, емдеу мен дәрі-дәрмекке бөлінген қаражаттың жұмсалуының ашықтығын қамтамасыз етеді. Сол кезде азаматтар да, дәрігерлер де, мемлекет те реформалардың нәтижелерін айқын көретін болады», - деп атап өтті Олжас Бектенов.