Өткен екі айда жұмыс берушілер мен жеке кәсіпкерлер "Әлеуметтік медициналық сақтандыру қоры" КЕАҚ-ның Ұлттық банктегі есеп-шотына 6,6 млрд теңге аударды.
Аталған уақыт ішінде жұмыс берушілер қарамағындағы жұмыскерлер үшін 5,2 млрд теңге (жалпы соманың 78,5%) аударым жасаған. Қалған 1,4 млрд теңге немесе жалпы соманың 21,5 % жеке кәсіпкерлер мен азаматтық-құқықтық келісімшарт негізінде жұмыс істейтін азаматтарға тиесілі.
Жарна төлеу жағынан Алматы (20,5%) мен Астана (11,6%) қалалары, Қарағанды (8,7%) және Шығыс Қазақстан облыстары (8,3%) көш бастап тұр.
Екі айдың көрсеткіштері қордың алдын ала болжамдарына толық сай келеді. Естеріңізге сала кетсек, жыл соңына дейін 23 млрд теңгеге жуық сақтандыру төлемдері түсуі тиіс.
Бұған дейін хабарланғандай, 1 шілдеден бастап жұмыс берушілер, жеке кәсіпкерлер мен азаматтық-құқықтық келісімшарт негізінде жұмыс істейтін азаматтар міндетті сақтандыру жарнасын /аударымдарын/ төлеуге кірісті.
Заңға сәйкес, жұмыс беруші ай сайын жұмыскер жалақысының 1 пайызы мөлшерінде аударым жасайды. Бірақ ай сайынғы жарна мөлшері 3669 теңгеден аспауы тиіс (бұл 15 ең төменгі жалақының 1%).
Ал, жеке кәсіпкерлер мен осы санатқа жатқызылған жеке меншік нотариустар, жеке сот орындаушылары, кәсіби медиаторлар 2 ең төменгі жалақының 5 пайызы мөлшерінде жарна аударады. 2017 жылы бұл сома 2446 теңгені құрап отыр. Сонымен қатар, жеке кәсіпкерлер қарамағындағы жұмыскерлер үшін жұмыс беруші ретінде аударым жасауы тиіс.
Азаматтық-құқықтық келісімшарт негізінде еңбек ететіндер ай сайын табысының 5 пайызы мөлшерінде жарна аударады. Бірақ бұл санаттағылардың жарнасы да 3669 теңгеден аспауы тиіс.
