Қордың Қостанайдағы филиалында жаңа директор тағайындалды
Бүгін Қордың Басқарма төрағасы Болат Төкежанов Қостанайдағы филиал қызметкерлерімен жұмыс кеңесін өткізіп, онда жаңа директор - Батырбек Нұрғалиевті таныстырды.
Батырбек Нұрғалиев еңбек жолын 1994 жылы Қостанай облыстық ауруханасында анестезиолог-реаниматолог дәрігер болып бастаған. Бұған дейін Қостанай, Солтүстік Қазақстан облыстарында Медициналық қызметке ақы төлеу комитетінің департаментін басқарған. Соңғы уақытта Әлеуметтік медициналық сақтандыру қорының Ақтөбе облысы бойынша филиалының директоры қызметін атқарды.
Ұжым алдында сөз сөйлеген Болат Төкежанов Сәуле Аймұхамбетоваға Қостанай филиалының директоры болып жұмыс істеген жылдары үшін алғысын білдірді. Ол сәуле Аймұхамбетованың филиал құрудың бастауында тұрғанын және зейнеткерлік жасқа толуына байланысты филиал директорының орынбасары лауазымына ауыстырылғанын атап өтті.
Атқарылған жұмыстар туралы есеп бере отырып, Сәуле Аймұхамбетова халықты медициналық сақтандыру жүйесіне тарту, осы жылдың 6 айының қорытындысы бойынша медициналық ұйымдарды қаржыландыру жоспарын іске асыру бойынша атқарылған жұмыстар туралы егжей-тегжейлі айтып берді.
Болат Төкежанов Сәуле Аймухамбетованың жұмысын жоғары бағалап, "Еңбек сіңірген қызметкер"төсбелгісін табыс етті. Сондай-ақ филиалдың жаңа директорына жемісті жұмыс тіледі.
Кездесу соңында басқарма төрағасы Болат Төкежанов филиал ұжымына медициналық ұйымдарды уақытылы қаржыландыру, медициналық қызметтерге сапалы мониторинг жүргізу, сондай-ақ пациенттердің құқықтарын қорғауды қамтамасыз ету үшін кері байланыс арналары арқылы келіп түсетін халықтан мәселелерді жедел қарау бойынша жұмысты жалғастыруды тапсырды.
