МӘМС КЕҢЕСШІЛЕРІН АСТАНА МЕДИЦИНАЛЫҚ УНИВЕРСИТЕТІНІҢ БАЗАСЫНДА ДАЙЫНДАЙДЫ

МӘМС негіздері мен пациенттердің құқықтары елордалық медицина университетінің оқу бағдарламаларында оқытылатын болады. «Әлеуметтік медициналық сақтандыру Қоры» КЕАҚ мен «Астана медицина университеті» КЕАҚ арасында өзара ынтымақтастық туралы келісімге қол қойылды. Құжат міндетті әлеуметтік медициналық сақтандыру жүйесінің жұмыс істеу негіздері бойынша курсты білім беру процесіне енгізуге, МӘМС жүйесіндегі пациенттердің құқықтары туралы білімдерін жетілдіру және азаматтық жауапкершілікті тәрбиелеуге бағытталған.

ӘМСҚ Басқарма төрағасының орынбасары Индира Саркенова атап өткендей, АМУ-мен меморандумға қол қою – бұл Қордың білікті мамандарды даярлау және міндетті әлеуметтік медициналық сақтандыру саласында озық тәжірибелерді енгізу үшін жаңа мүмкіндіктер ашатын алғашқы білім беру бастамасы.
«Медициналық сақтандыру қағидаттарын білу болашақ дәрігерлерге денсаулық сақтау саласындағы білікті мамандар ғана емес, сонымен қатар бүгінгі күні барлық азаматтарға сапалы және қолжетімді медициналық көмек көрсететін медициналық сақтандыру жүйесінің тиімді қатысушылары болуға көмектеседі», – деді Индира Саркенова.

Өз кезегінде Астана медицина университетінің ректоры Анар Тұрмұхамбетова жасалған келісім МӘМС жүйесін оқу үдерісіне енгізудегі маңызды қадам екенін баса айтты.
«Студенттерді МӘМС-тің негізгі аспектілеріне оқыту олардың кәсіби құзыреттілігін арттырып қана қоймай, медициналық сақтандыру мәселелеріне жауапкершілікпен қарауды қалыптастыруға мүмкіндік береді. Бұл жоба денсаулық сақтау саласындағы болашақ дәрігерлер мен консультанттарды даярлауға елеулі үлес қосатынына сенімдіміз», – деп түйіндеді Анар Тұрмұхамбетова.

Қор МӘМС жүйесін жетілдіру және болашақ мамандарды даярлау деңгейін арттыру үшін қолайлы жағдай жасай отырып, жоғары оқу орындарымен және білім беру орталықтарымен ынтымақтастықты кеңейтуді жалғастырады.