«Транспаренси Қазақстан» ҚҚ «Медициналық сақтандыру қоры» КЕАҚ Директорлар кеңесі мүшелерінің сыйақысы туралы ақпараты шындыққа сәйкес келмейді
Ағымдағы жылдың 25 желтоқсанында «Транспаренси Қазақстан» қоғамдық қоры өзінің интернет-ресурсында «Медициналық сақтандыру қоры» КЕАҚ (бұдан әрі - Қор) топ-менеджментіне Қор алған активтерден ай сайынғы сыйақы төлеу туралы ақпаратты орналастырды.
Осыған байланысты Қор бұл ақпарат шындыққа сәйкес келмейтіні туралы хабарлайды
Қордың Директорлар кеңесінің 3 тәуелсіз директоры ғана корпоративті басқару шеңберінде Қазақстан Республикасы Қаржы министрлігінің Мемлекеттік мүлік және жекешелендіру комитетімен келісім бойынша денсаулық сақтау саласындағы уәкілетті орган белгілеген мөлшерде тоқсан сайын сыйақы алады. Қайта есептегенде айына 250 мың теңгеден аспайды. Директорлар кеңесінің қалған мүшелері ақысыз жұмыс істейді.
Бұл ақпарат құпия емес. 2018 жылға аудиторлық есеп Қордың fms.kz сайтында «Қаржылық есептілік» бөлімінде орналастырылған. Өткен жылдың соңында, жалпы алғанда, тәуелсіз директорлардың қызметтері бойынша шығындар 6 миллион теңгеден сәл асты.
Айта кету керек, 2019 жылы Директорлар кеңесінің мүшелері үшін сыйақы мөлшері өзгеріссіз қалды.
Қордың тауарларын, жұмыстарын, қызметтерін мемлекеттік сатып алудың жылдық жоспары жыл сайын Қазақстан Республикасы Қаржы министрлігінің мемлекеттік сатып алу веб-порталында goszakup.gov.kz және Қордың fms.kz сайтында «Мемлекеттік сатып алу» бөлімінде орналастырылады.
